السلااااام عليكم يا احلى ناسات يقرو المدونه حقتي



اليوم انا مررره حاسه بالانجاز لاني قبل شويه خلصت من عمل حلو وخفيف بالكروشيه حبيب القلب مازولا،،،

عبار عن كوزي لبراد الشااااهي،،،

لي فتره شايفته في مدونه وحده استراليه بس حسيته صعب،، لكن  قبل كم يوم مسكت الباترون واتحديت نفسي يا انا يا هو!!!
لازم اقراه واسويه ،، ولا ما اأكون حنين!!

المهم بدأت اخبط،،،،،،، ٤ تجارب فاشله والخامسه ضبطت الحمدلله

وهذي النتيجه

ايششش رايكم بس؟؟ مايشهي الواحد يشرب شاااهي ع روااااق

هنا صورته جنب تبسي الفطور حقي ،،،،،، تخيلو مافطرت الا بعد ماخلصصصته ونظفته من الخيوط عشان اعرف افطر صح هههههههههههه

عموما،،،، وانا اشتغل فيه!! ابو لتين قال الغرزه حلوه!! كأنها قشور سمكه!! قلتلو افااااااااااااا بس!!!!
كأني سمعت اسم هالغرزه قبل :( وانا قاعده اتعب نفسي واقرا الباترون ومسويه تحديات ومصعبه الحياه
وطلع صح الغرزه موجوده لو سألتو عمكم قوقل

عموما انا انبسطت من نفسي ومن التحدي الحلو الي سويته وان شالله راح اسوي اكثر من شكل قريب جدااا

هنا المدونة الي اخذت منها الباترون + الفكرة اضغطي هنا




.....

ثاني شي قبل كم يوم وصلتني طلبية كتب انا كنت طالبتها من امريكا =)

ومرررررره انبسطت فيها وهنا بعض الصور


بيرفوت كونتسا - وافري داي ايتاليان والتالت حق تربيه
طبعا اول كتابين طبخ ،،، طباخات اتعودت اشوفهم في فتافيت والكتب حلوه وان شالله قريب ابدأ اطبق

الكتاب الاخير صاحبتي امها امريكية وقالت لي عليه ،،،، واعطتني كم وصفه منها ولما جربت الوصفات ماترددت اني اطلبه ومن جد طلع مررررجع كاااامل للوصفات الامريكية واساسيات الطبخ

 

الكتب كلها موجوده في امازون لو تحبو تشوفو اراء الناس فيها

وان شالله احط لكم بعض التطبيقات هنا لو مداني الوقت لاني مو من النوع الي اصور الطبخ الا بعد مايخلص اما بالخطوات مااااعرف احس الدنيا تحوس معايا

ان شالله تدوينتي اليوم تكون خفيفه عليكم 

ولاتنسو الردود الي تسعدني كثيرررر

على فكرة،، ابغا اضيف سمايليز للمدونه تبعي،، كيف الطريقه؟ الي تعرف تدلني الله يخليكم

السلام عليكم


جمعة مباركة عليكم جمييييعا،،،

لي اسبوع تقريبا انتهيت من قرءة كتاب

الكتاب حلو مره ويشرح كيف الطفل الدارج ( من عمر سنه الى ٤ سنوات ) يتصرف ويفكر وكيف ممكن نتعامل معااه

باختصار، يقول لنا عامل الطفل كأنه رجل كهف،، لانه مايسيطر على مشاعره ،، وتصرفاته جدا هجميه،، وتعاملنا معه كشخص كبير تصرف جدا خاااطيء

الكتاب في تقنيات يستخدمها الاهل عشان يتصرفو معااه عند نوبات الغضب والي تكون كثييير في هذا العمررررر

ومسمي التقنيه : The fast food rule

راح اقول لها هنا باختصار...:

اذا طفلك مسك قلم وبدأ يلعب فيه وانتي عارفه انو خطأ،، المفروض ماتشديه منه لانك راح تتسببي بنوبة غضب قوووويه!!
روحي عند الطفل وقوليله : انت تبغا القلم ،، تبغا القلم... انت تبغا القلم عشان تكتب فيه
خلي صوتك عالي ومتحمسه وتكوني قاعده عالارض عشان تكوني بمستوى الطفل،،، واهم شي الحماااس
وتكملي،،،،
" انت تبغا القلم عشان تكتب فيه صح صح؟؟  " كرري هالكلام لين تحسيه بدأ يسمع بعدين كملي
" ماما تقول لا ... ماما تقول لا ... ماما تقول لا للقلم ،، القلم خطأ نمسكه"

هنا وضحنا للطفل انه خطأ الشي الي سواه،،،، نبدأ دحين نعطيه البديل

" شوف شوف قصه ،،،، قصه حقتك.. تعال نقرا قصه.. هيييييييه قصه قصه قصه.... " 

وبس..!!!

راح تشوفي ان الطفل ترك القلم واتجهه للقصه ونسي الشي اصلا الي كان يبكي عليه...


التكنيك هذا جربته مع لتين بنتي... وضبط....!!!!!!

طبعا للي مايعرفو،،، ان لتين حاااااادة المزااااااج مرررررره،،، عصبيه اي شي صغير يثيرها،،،،

فمادام انو ضبط معاها ،، راح يضبط ان شالله مع باقي الاطفال


تبقى الصعوبه في التطبيق،،، التقنيه محتاجه انك تكوني شجاعه صراحه ،، لانك راح تكلمي الطفل كأنه رجل كهف...
صوتك عالي!! وتكرري الكلام ورا بعض... ومتحمسه كأنك في حفله!!!" لان هذا الشي الي راح يخليه ينصرف عن التصرف الخطأ

بس لما تكوني بره ايش راح تسوي؟؟! صراحه انا ماقدرت اسويها بره لاني استحي ارفع صوتي كثير.. ومو حلوه الفت الانظار عليا لوووول،،، بس ممكن اقول لابوها يسويها ،، مع اني اشك ان اي احد راح يشوف الموقف وهو يصير،، حيقول : خيييير ايش ساير فيهم؟؟!

بس صدقوني التقنيه تعتبر حاجه كويسه عشان نتعامل مع هذا السن الصعب ،،، خصوصا الي حول عمر السنتين يكونو حادين الطباااع ،، وبسرعه يحسو بالاحباط،،


هذا باختصار الي استفدته من الكتاب وان شالله تكونو استفدتو لو شويه،،، واي ملاحظات ياهلا بكم...

ونشوفكم على خير ان شالله